در فکر گلی بودم و گلزار خریدم
«نظمی تبریزی(ره)»
در فکر گلی بودم و گلزار خریدم
«نظمی تبریزی(ره)»
شکسته نی کیمی وار دلده غم نواسی قیزیم
دوشوبدی باشیمه کرب و بلا هواسی قیزیم
گیدوم تدارک ایدوم اوردا محفل ماتم
یاخونلاشوب باباوین اربعین عزاسی قیزیم
گَلَنده قبره قویام اولمادی منه فرصت
گیدوم گوروم نجه دور قبرینون بناسی قیزیم
علاوه قیرخیدی ، لازمدی قبری اوسته گیده
دویونجا آغلاماقا اکبرین آناسی قیزیم
رباب چوخ داریخوب اصغرین فراقینده
گیدور گوره نجه دور حلقینون یاراسی قیزیم
گرک گیدم آپارام قارداشیم علمداره
ودیعه دور منه دلدن عمون لواسی قیزیم
سنون یولوندا قالوبدور بابان گوزی نگران
گیدوم دیوم که ندور باشیوین بلاسی قیزیم
بو قبر پاکیوه هر کس گَله بصیرتیله
گَلر قولاقینه بیر حق طلب صداسی قیزیم
دیمه خرابه ده من اولموشام غریبه مزار
قبیله کوچ ایدوری قالمور آشناسی قیزیم
بو قبریوی ایدر آباد شیعۀ دیندار
بو بارگاهین اولار گنبد طلاسی قیزیم
خدا بُلور که سنی گوزدن آتمارام هرگز
آزالمیوبدی سنه قلبیمون وفاسی قیزیم
ولیک گیتماقا مجبورم اینجیمه مندن
مریض ایدوبدی منی شامیان جفاسی قیزیم
علاجی اولمیان امراضه وار بو یرده دوا
علاوه اوردادی بو قلبیمون صفاسی قیزیم
یوخومدی شالِ عزا سالماقا او قبر اوسته
مزارینه سالارام منده بو لباسی قیزیم
اگرچه پاره لَنوب، قانیله اولوب الوان
خدا بُلور که ندور کوینگون بهاسی قیزیم
حسین زیارتیدور چون علامت ایمان
بو فیض اولوبدی منه خالقون عطاسی قیزیم
نماز شبده برات زیارت ایسته میشم
که استجابت اولوب عمّه وین دعاسی قیزیم
دوباره سندن اوتور شامه ایلرم رجعت
اگر نصیب ایده بو حکمت اقتضاسی قیزیم
بو قطعه بانیسی «یعقوبیه» اوزون صله ویر
عزیز عالم اولا تا بابان گداسی قیزیم
عنایت ایت اولاری قورتولا شماتتدن
که یوخدی هیچ بیرینون خانه و سراسی قیزیم
بابا سیاحته مردم گیدر چمن یرینه
سنون خرابیه باشون گَلوب بدن یرینه
دئسم خرابیه خوش گَلموسن سزا دگلی
رقیّه نون ولی خوش گلموسن ئولن یرینه
اجازه وئر دوشویوم زلفیمی وئروم زینت
گُل بنفشه و نسرین و یاسمن یرینه
سویوندوقومدان ایتیردیم اوزومی هیچ دئمدیم
فدا کسوک باشیوین من گَلوب گیدن یرینه
ایاقلاروندان ئوپردیم اولِیدی گر ایاقون
بو قانلی باشیوین اولّام فدا گَلن یرینه
ازلده رسمیدی بو ، باش چکر ائلین بویوکی
سبب ندور صورا گَلدون ائلین دوشن یرینه
ایشیتمیشم چوخ ئوپرموش آنان بوغازوندان
قویوم دوداقیمی قوی بیر آنان ئوپن یرینه
بو توزلی زلفیمی تیل تیل وفالی قیزلار تک
جنازن اوسته توکه بولمدیم کفن یرینه
سنی نیه یولا تک سالدی اکبریم هانی بس
فدا اولا باجیسی اکبرین گَزن یرینه
داریخموشام بابا قِیتر منی آپار وطنه
علاقه مند اولی غربت چکن وطن یرینه
نه خوش گلور سویی نه اهلی نه هواسی منه
بو یاخشی دور کوچه هر طایفه سوین یرینه
مریضه ام بابا شامه گَلوب گلن گوندن
قوی عرض ائدوم ندی عرضیم گَلوب سخن یرینه
گونوزلر ایستی اذیّت ویرور، سویوق گئجه لر
گوگل آچلموری هی غم گلور محن یرینه
بیری باخور گولور احوالیمه بیری آغلور
هی آغلین گیدوری هی گلور گولن یرینه
نه یاخشی گوزلریوی یومّوسان فدا گوزیوه
گوزون ساتاشموری بوینومداکی رسن یرینه
دانشموسان بابا یوخسا دوداقلارون یارادی
فدا او لبلریوه من آقاج دگن یرینه
گئجه گونوز اورگیم تیترور اصغریمدن اوتور
او اصغری که ایچوب قانینی لَبن یرینه
منه ده کاش دگِیدی اونون کیمی پیکان
ئولیدیم اصغریم ای کاش کاش من یرینه
مدینه یوسفی اکبر بولم بو شهره گَلوب
کلاف جان گیدرم الده پیره زن یرینه
تمام اولا بیر اوزون گورماق عمر قیمتینه
بو نقد جانیمی نقد ایلرم ثمن یرینه
عموم امام حسن یادگاری هاردا قالوب
بیبیم ئوپِیدی یوزین قارداشی حسن یرینه
نیه عروسینی نو کدخدا سالوب گوزدن
باجیم قرا گیونوب نیلی پیرهن یرینه
رقیّه عهد ایلیوبدی عمو سو ایستمه سون
یولون دوشنده اونون پرچمی دوشن یرینه
ایله ملر حرم آهولری گئجه گوندوز
خرابه شام مبدّل اولوب ختن یرینه
بیبیمون آغلاسان احوالینه اگر باخسان
نحیف پیکرینون قمچی لر دگن یرینه
ادیب اودور اولا آزاد «حافظی» یا قول
نه قدر بولسه اوزین قویمه بولن یرینه
اوزی اوزین بگنن شاعری بگنمز خلق
سوزی سوز اولماسا قویمازلا سوز دین یرینه
حافظی(ره)
علی سواره گئدیبسن، ولی پیاده گلیبسن
اویان گوروم ندی دردون، نییه عباده گلیبسن
عبانی رد ائله یوزدن او شمع حسنی آلیشدیر
یامان گونومدی بیلیرسن، بو بینوانی دانیشدیر
یاروندا واردی اذیت و یاکی چوخ یورولوبسان
یقین بو قد رسایه دگیبدیر اوخ یورولوبسان
آیاق طرفده اوتوردوم تصور ائتمه یادام من
بو قانلی چکمهلریوی گرک اوزوم چیخادام من
سینهمین اوسته قویام من بو قانه باتمیش ایاقون
دانیشدیرام سنی بلکه اوپم او قانلی دوداقون
اوتانیرام علی اکبر! آتام عبانی یوزوندن
بو قاره معجریملن سالام او قانی گوزوندن
گرهک ایاق طرفونده اولا بو قلب شکسته
بیبیلرون باخیر آخر نئجه گلیم باشون اوسته
کنیزدور بو مکاندان آنون نه عذریله دورسون
کنیزلر گرک اوغلوم آیاق طرفده اوتورسون
تعجبم بو غمون قلبیمه شراره توکوبدور
آتون بو قدرسانی نییه عبایه بوکودور؟
بو نقشهنی بیلیرم من، گلیبدی درده چکیبدیر
یارالی سینوون اوسته عبانی پرده چکیبدیر
منی نظرده دوتوبدور و یا سکینه زاری
بو فکریلن کی مبادا گوزوم گوره یارالاری
باخیب عباسینه بیلدیم ولی نه قدری یارون وار
مگر سنین بدنونده سلامت عضو هارون وار
بو نوعیلن کی آخان قان، ائدر بو توپراغی گل نار
بئیله مشخص اولور کی منیم ائویمی ییخیبلار
بلا تموج ائدیب گور گلیب هایانا چاتیبدیر
یقین سنی گتیرنده، آتاندا قانه باتیدیر
یارالانیبسان ائشیتدیم غم و ملالیله گلدیم
اوزومده بیلمیرم من، بورا نه حالیله گلدیم
قانادی باغلی اولان، قوش کیمی بو یئرده سیخیلدیم
یول اوسته بیر نئچه دفعه بورا گلینجه ییخیلدیم
قارا ساچیم کیمی دنیا اولوبدی تیره گوزومده
بیبیلرون منی گتدی یوخودی طاقت اوزومده
تعجب ائیلیرم ای نژاد هاشمه فاخر
گلیب بورا نئجه چاتدیم نییه من ئولمدیم آخر
یانیر اورک علی دور گور بو دربهدر نییه آغلار
جوان اوغوللار آنانی مگر بو نحویله یوخلار
یوخودی من گورورهم یا کی آشکاردیر اکبر
عبا ایچینده کی سنسن بو حالیلن گتدیلرر
سنی نه حالیله سالدیم یولا منایه گئدنده
عبا ایچنده گلیبسن ولی خیامه گلنده
قیزارمیسان گلـه یاقـوته اوخشوسـان نئجـه گـورسن
باخان دییر طوی ائدیبسن لباس طوی گئیینیبسن
قوتارمییان غم ودردیم سوزوم بوقلبیده واردی
جنازوه یئتیشینجک اینان کی زلفوم آغاردی
قاباغووا منی عفو ائت گلنده گلمدیم اکبر
حرمسراده اوتوردوم اوزومی بیلمدیم اکبر
فدا او گوزلره لیلا، اویان اویان نه یاتیبسان
من فلک زدنی اولما خاطروندن آتیبسان
گوزوم عذاریمه قانیاش توکه مجاز ائیلیورسن
سسیم قولاقیوه یتمیر و یا کی ناز ائیلیورسن
اِراده هر یانا ائتسون گلیب دالونجا سوروننم
طویون گورنمدیم اما لباس قاره بوروننم
یوخومدی چاره بو یرده پناه صبره آپاررام
کچیبدی نسگلون حددن،اورکده قبره آپاررام
یازاندا محنتون «انور» گلر تموجه دردی
بیلیر علی باشون اوسته آنون نه نوعی ملردی
بو قانلی گوزلریوه من فدا اوغول گوزون آچ
یوزیمه بیرده باخ ای دلربا اوغول گوزون آچ
قوجا آتا گوره بولمز جوان اوغول بدنی
یارالی گون قاباقیندا قالا اوغول گوزون آچ
سنی بو حاله سالان اللری گوروم اولا شل
بو قدر کیم سنه ووردی یارا اوغول گوزون آچ
ایاقلاریم یریمور گئتماقا دیزیم گلمور
ایاقه دور الیمه اول عصا اوغول گوزون آچ
غریب آتان باشون اوسته دوروب یانار آغلار
بو قدر ناز ائلمه با وفا اوغول گوزون آچ
سنی گورنده قوری یرده ای گوزوم نوری
گوزومده قالمادی ای با وفا اوغول گوزون آچ
ورق ورق داغیلوب گُل کیمی بو گُل بدنون
گُل اوسته بلبلون ایلور نوا اوغول گوزون آچ
دلیمده واولدا ناله سین ایشیتمورسن
دولوبدی بو سسیله نینوا اوغول گوزون آچ
یارالی سان قوری یرلرده یاتما اینجیرسن
خیامه دور گئداخ ای مه لقا اوغول گوزون آچ
یولون گوزتلور اوغول خیمه ده اوغولسوز آنان
دلینده واولدا بر ملا اوغول گوزون آچ
آپارماسام سنی ایندی گلولّه میدانه
الینده ساچلاری آلعبا اوغول گوزون آچ
«حسینی» آغلا حسینه او حالی سال یاده
دئیردی پادشه کربلا اوغول گوزون آچ
«حسینی(ره)»
ای امامتین آسمانینه بیر مه منوّر عم اوغلی جان
آغلامه، گئجیله گونی منه ایلمه برابر عم اوغلی جان
منده تا نفس وار بیله خیال ایلمه وطنده غریب سن
فکریوه گتورمه کمکسیزم ایل قبیله دن بی نصیب سن
من مریض عشقم منیم بو گون درد عشقیمه سن طبیب سن
تاپشیروب امانت سنه منی حضرت پیمبر عم اوغلی جان
ای وصیّ پیغمبر خدا، وی ولیّ خلّاق کردگار
ایمدی هوش آپاردی بابام گلوب گوردوم عارضینده غبار وار
بار غم بوکوب گوردی قدّیمی منده قالمیوب تاب و اختیار
گوردوم آغلوری، انتظاروام سویلوری او سرور عم اوغلی جان
من شراب عشقین ازل گونی نوش ایدوب او می مست مستیم
ظاهری جهانه گلوب سنون رشته ی علاقنده بستیم
جور و ظلمیدن دل شکسته سن، منده سن کیم دل شکستیم
آتش غمون قلبیمه سالوب سونمیَن بیر آذر عم اوغلی جان
آچمورام سوزون اوستونی نلر چکمیشم یانوب درگهیم منیم
دوشموشم فشاره سخلدی چوخ یاندی بو دل آگهیم منیم
ثانی ووردی سندی قاپی او دم تار و مار اولوب خرگهیم منیم
آشیانیم اود دوتدی قوش کیمی یاندی بال و پرلر عم اوغلی جان
من ریاض عشقونده یاعلی دورت قزل گله باغبانیدیم
زحمتین چکردیم گئجه گونوز دورت گلون، اوزوم شادمانیدیم
نه آنا نه باجی نه قارداشیم وار اودور که من باغری قانیدیم
تک سنی بُلردی امید دل روز و شب بو مضطر عم اوغلی جان
دوقّوز ایلده اولدی سنه منیم هر نه قدر عفو ایله زحمتیم
دوقّوز ایل سنه همسر اولموشام اوج ایدوب منیم شان و شوکتیم
خدمت ایلدوقجا سنه منیم آرتدی حق حضورینده عزّتیم
گَل حلال ایله حقّیوی منه ای بتوله سرور عم اوغلی جان
ایلرم سپر هر بلالره سندن اوتری بو خسته جانیمی
قویمارام حسابه توکوبدولر پشت درده توپراقه قانیمی
دوزمرم دیدیم حالینی گورم منقلبدی روح و روانیمی
شاهد عرضیمون صدقینه اولار ربّ حیّ داور عم اوغلی جان
غسل ویر گئجه دفن و کفنیمی قبریمی ایله گیزلین آغلاما
دفن ایله بیر آز قبریم اوسته دور عارضه دُر اشکی باغلاما
صبر ایله دایان هر مصیبته، هجریمه یانوب سینه داغلاما
آغلاسان مزار ایچه غملنَر حالیوه بو مضطر عم اوغلی جان
دورت بالام آناسیز قالور منیم دوت دله اوزون قویما آغلاسون
زینبیم دوزنمز فراقیمه مانع اولما قوی قاره باغلاسون
مانع اول حسینیم گر آغلاسا، مندن اوتری او سینه داغلاسا
قبر ایوینده قلبیم یانار اولار غملریم مکرّر عم اوغلی جان
دردی اولسا هر کیمسه نون اگر عرض قیلسا گر شیر داوره
دردینه علاج ایلیر یقین دیمیه داخی شخص دیگره
خدمت ایله یعقوبی صدقیله توشه اخذ ایله روز محشره
فاطمه دیه گوز تیکوب بیزه حشریده بو نوکر عم اوغلی جان