زبانحال حضرت ابوالفضل(ساکت)

 

به راه عشق تو دست از همه وجود کشیدم

هزار شکر که بر آرزوی خویش رسیدم

 

خجل شدم که نشد آب بر خیَم برسانم

و لیک آبروی هر چه تشنه بود خریدم

 

بیا که فاطمه ام آمد و گرفت سر از خاک

زهی که لذّت شهد برادری بچشیدم

 

کرم نمود و عطا ، تا مرا به لفظ پسر خواند

ز شوق جامه دَریدم ، ز جاه بالیدم

 

چه گویمت که به راه تو از دل و از جان

چه سعی ها بنمودم ، چه رنج ها که کشیدم

 

دعای خیر تو نازم که خصم با همه لشکر

ز پیش من برَمیدند و من نرَمیدم

 

بدان امید که شاید تو را ز غم برهانم

دو دست نذر تو کردم ، دل از دو دیده بریدم

 

تو را همیشه بباید شناخت ای گل زهرا

فرات هم که گرفتم ، به آب عکس تو دیدم

 

نسیم آب شراری دگر به آتشم افزود

چو بوی سوز دلت از نسیم آب بشنیدم

 

فغان که آنقدرم وقت نیست می ترسم

تو تا به من برسی من به آن جهان برسیدم 

حضرت ابوالفضل(سعدی زمان)

من ابوالفضلم جماعت، شهر‌تیم دوتموش جهانی

قدر‌ت الله  اوغلویام من، حیدر  کرار ثانی

 

یادگار نامدار  غازی بدر و  حنینم

حیدر کرار آتامدور، مرتضا‌یه نور  عینمم

هم سپهسالار لشگر‌، هم علمدارحسینم

ائیلرم  ظاهر بو چولده، صولت شیر خدانی

 

دیلده یوخ بیر ذره باکیم، گر دوتا دنیانی دشمن

اولدی  گرچه آل هاشیم، اولمایین اولمکدن‌ ایمن

قویمارام جنبنده سیزدن تیغ قهرآمیزیله من

چرخ اطلس  گورسه تیتر‌ر، بو حسام جانسیتانی

 

مجلس شورای جنگین، صاحب اور‌نگییم من

لشگر شاه حجازین، باهنر سرهنگیم من

بو کومکسیز پادشاهین چون وزیر جنگییم من

وئرسه رخصت ائیلرم بو عالم امکانی فانی

 

گر ائدم دعوایه اقدام، ای گروه پست فیطرت

قویمارام قالسین بو چولده بیر نفر سیزد‌ن سلامت

گئچمک اما باش جاندان، چون وظیفمدیر جماعت

قانیمیله دینه وئرر‌م، بیر حیات جاویدانی

 

بیشه‌  هیجاده شیر‌م، قاف رزم عنقاسییم من

هر فنون جنگ جنگی ایشلرین داراسییم من

عتر‌ت شیر خدانین، تشنه لب سقاسیم من

نهر علقمدن خیامه، باغلارام آب روانی

 

خیمه‌ده آغلیر سوسوزدان، عتر‌ت شاه مدینه

العطش فریادی یئردن، اوج ائدیر عرش برینه

چیگنیمه سالدی گلنده، بو قورو مشکی سکینه

ائیله‌دی سو التماسی، بیر منه گلدی گمانی

 

بو حسینی کی سپاهین، ائیلییب‌سیز قانه غلطان

جان زهرادور جماع‌ت، هم امام کون امکان

حجت‌الله بیلمیسیز گر، فرض ائدین سیز بیر مسلمان

قویمایین یانسین سوسوزدان، عترت  بی‌خانیمانی

 

ائیلدی اتمام حجت، لشگرره هر چند او سرو‌ر

اولمادی اصلا موثر، گلمه‌دی رحمه او لشگر

بیر نفر سسلندی اما، کی هنرو‌ر پور حیدر

ائیلمه سو اوسته بیجا، سن ملام‌ت شامیانی

 

گر ایکی ایشدن بو چولده، اولمیا بیر امره مجرا

یئر یوزین دولدورسا دریا، وئرمریک بیر قطره اصلا

یا گرک قارداشین اولسون، بئیعته دیلده‌ن مهیا

یا بو تشکیلاتی پوزسون، تیغ قیلسین حکمرانی

...

جنگ عباسی گوره‌نده، قودسییان گلدی نوایه

سس سسه وئردی ملکلرر، عرض قیلدی مرتضایه

ائیلیری عباس دعوا، یا علی باخ کربلایه

گوستریر  اوغلون حسینه، گور نه نوعی جانفشانی

 

بیر رشادت، بیر شجاعت ، گوستریب اول تشنه سقا

عرصه تنگ اولدو سپاهه، سیندی صفلر قاچدی اعدا

آلدی تا نهر فراتی فارس میدان هیجا

بیرقین نهر اوسته ووردی ، اول وفا و مهر کانی

 

لشگره سس دوشدی  آلدی، نهری بو یالقوز علمدار

خیمه ده ناگه ائشیتدی، بو سسی تشنه اوشاقلار

خیرداجا قیزلار سوویندی، داده گلدی آل اطهار

باشینا ییغدی سکینه، عتر‌ت آل عبانی

 

اللـ‌رینده بوش سو جامی، گلدیلر داده نوایه

یوز دولاندیردی خانیملار، بارگاه کبرییایه

عرض ائدیبلر بارالاها، حافظ اول صاحب لوایه

حفظ قیل شر عدود‌ن، یادگار مرتضا‌نی

...

اول قد‌ر گئچمیب، حسینین گول کیمی رنگی سارالدی

سسلنیب وای قارداشیم وای، زینبین آرامین آلدی

یعنی عباسین سو اوسته، قوللارین شام اهلی سالدی

اوخلانیب سو مشگی گئتدی، طاقت و  تاب و توانی

حضرت ابوالفضل(عابدخیابانی)

تعجیل ایله گلماقدا اماندور آتام اوغلی

سندن اورگیم چوخ نگراندور آتام اوغلی

عفو ایله بو دعوتده اگر اولدی جسارت

اولسون قسم اوز جانوه خواهشدی نه دعوت

احسان ایله بو خواهشیمی ایله اجابت

گل باشوه عباسی دولاندور آتام اوغلی

تا گوز آچوب احساس ایلدیم گوز نَدی قارداش

خورشیدیله مَه یا گئجه گوندوز نَدی قارداش

نطقه گله‌لی درک ایده‌لی سوز ندی قارداش

عبّاسه آدون ورد زباندور آتام اوغلی

یوخدور نظر الفاظیده سنسن هامی منظور

سن دلده بیان گوزده ضیا باشدا اولان شور

گوز چهره ‌وی ترک ایتمدی، گوردون شب عاشور

هرگز دیمدی باغ جناندور آتام اوغلی

عادتله یانان قلبیم ایدوب اسمیوی تکرار

خشکیده زبان ایتدی اورک دردینی اظهار

عشقون که منی ایلدی بو خواهشه وادار

ذرّات وجودیمده نهاندور آتام اوغلی

عشقوندی فقط قلبیده یوخ اوزگه تعلّق

بو خُلقله نفسیم تاپیب اوّلده  تخلّق

گَل گَلماقیوا ایت گیله عباسی تصدّق

هر بیر قدمون ارزشی جاندور آتام اوغلی

جان فدیه ی یار اولماسا خدمت دیماق اولماز

باش بذل نگار اولماسا عزّت دیماق اولماز

سودای محبّتدی مصیبت دیماق اولماز

هر غم منه تهذیب رواندور آتام اوغلی

بیر حرف زبانیمده منیم یوخدی گلایه

خشکیده لبیم خنده ویرار موج بلایه

امواج بلادور یِتورَن اوجِ ولایه

بو امر، مسلّم نه گماندور آتام اوغلی

من لازمیدی فدیه ی جانان اولام اولدوم

لب تشنه ره یاریده قربان اولام اولدوم

سو اوسته سوسوز قانیمه غلطان اولام اولدوم

سندن ولی دل چوخ نگراندور آتام اوغلی

مین‌لر من اولام بیر نفسون قیمتی اولماز

گل اولماسا هرگز چمنین نزهتی اولماز

سنسیز بو جهان اولسادا خاصیّتی اولماز

بالّهی جهان سنله جهاندور آتام اوغلی

سینم سپر ایستردی اولا تیر بلایه

تا یتمیه گنجینه ی اسرار خدایه

افسوس دوشوب توپراقا ایندی بو وقایه

هر چند گنه تیره نشاندور آتام اوغلی

دردیم بودی، سن بی‌ مدد و یاور و تنها

بو دشت کمین گاه و کماندار سراپا

ایوای، نشان بیر، یارالی تشنه لب، امّا

دنیا دولوسی تیر و کماندور آتام اوغلی

آخِر نفس احساس ایلورم عمره علاقه

ایستور منی توش ایتسون اجل درد فراقه

بیر لحظه بُلورسن دوشه گر سندن اوزاقه

عباسین او دم حالی یاماندور آتام اوغلی

گُل یاره ‌لر ایلوب بُلورم بو چولی گلشن

امّا ندی بو منظر گلگون گورورم من

آیا هامی دنیانی دوتوب سوری و سوسن

یا آینه ی چشمیده قاندور آتام اوغلی

یازدی خط خونین، ورق جسمیده شمشیر

گُلواژه ی عشق اولدی گوزل طرزیله تعبیر

دنیا بویی گویادی بو تعبیر و بو تحریر

اهل دله تبیان و بیاندور آتام اوغلی

دیداریویله دل یتر آخر بلی کامه

توفیق تاپار جان بُلورم اخذ مرامه

عطرون گَتورور باد صبا پیکی مشامه

انفاسی اودور مشگ فشاندور آتام اوغلی

مأنوس اولالی عشقه ازل، خامه ی تقدیر

دل صفحه سینه عکس رخون ایلدی تصویر

عشقون منه جان مونسی دور منده نه تقصیر

سنسیز گر ایشیم داد و فغاندور آتام اوغلی

قان سیل کیمی موج ووروب داغ داشا قارداش

بیر ورطه دی بو غم چولی باشدان باشا قارداش

قان قویموری قارداش یتیشه قارداشا قارداش

غَرقاب، کران تا به کراندور آتام اوغلی

بو طایفه دنیایه آزوب دینینی ساتدی

باشدان هوس باطله حق فکرینی آتدی

هر چند که ظاهرده اوز آمالینه چاتدی

هر سود، بو سو داده زیاندور آتام اوغلی

نفسیم اولالی نعمت تکوینیله مأنوس

اولدوم سنه خادم، سنه چاکر، سنه پابوس

آخِر نفسی ایلمه مشتاقیوی مأیوس

لطفه بُلوسن یاخشی زماندور آتام اوغلی

دل روشن اولوب آتشِ جانسوز جگردن

چوخ فیضه یتوب ناله ی شب، آه سحردن

دوشموب بُلورم ناله، دعا، آه، اثردن

دیدارون او تأثیره نشاندور آتام اوغلی

ای بارقه ی رحمت بی‌ منّت داور

ای جودِ مجسّم، کرم و فیض مصوّر

تنها نه منم لطفیوه محتاج، برادر

محتاج سنه کون و مکاندور آتام اوغلی

قان آیت نصرتدی بو قانلی علمونده

دل هدیه ی ناچیزیدی تشریف غمونده

باش نقده نثار اولماسا خاک قدمونده

جان دوشینه بیر بار گراندور آتام اوغلی

عابد سنه دم ویردیله ذهنی و سخاوی

چون ذکر مصیبتده او شاعر دی بو راوی

تکرار ایله اوّل سوز اولوب چوخ سوزه حاوی

تعجیل ایله گلماقدا اماندور آتام اوغلی

استمداد حضرت ابوالفضل(ذهنی زاده)

سنه قربان کسیلن قارداشا قارداش

خنجر چکوب اون یِتدی شقی بیر باشا قارداش

بوندان چون اولِیدی سنه چوخ شائق اولِیدیم

تشریفوه قربان کسیلوب لایق اولِیدیم

شانون دگی مندن سنه اظهار ارادت

شانوندی ولی بنده لره لطف و سیادت

گل چاکر جان بر لبوی ایله عیادت

گور بیر منه قارداش او عیادتده نَلَر وار

افسوس صد افسوس سنه درد کمر وار

قربان کسیلن قارداشوام قارداشا خاطر

بیر السیزم اللرده قالان بیر باشا خاطر

یولدا نگران یولدا گوزوم یولداشا خاطر

قارداش دیمورم من سنیلن قارداشام آخِر

چوخداندی بو یوللاردا سنه یولداشام آخِر

ای نور رخی کنگره ی عرشده لامِع

هر شاه و گدا درگهوه خاضِع و خاشِع

بو شانیله سندن نه گوزل راخدی تواضِع

شاها بو تواضِعده ده شاهانه اثر وار

من خاک رهِ مقدموه رفعت سر وار

حاشا که قدم رنجوه زیبندیم ای شاه

شهزادیم امّا سنه بیر بندیم ای شاه

بیر بنده ی شرمنده، سرافکندیم ای شاه

نیزه بویی باشیم اوجالا باشیم اوجالماز

دنیا بویی سو خجلتیم آرتار که آزالماز

بیر مشک سو تحصیلینه قیلدون منی مامور

بیر طالعه سیر ایله اودا اولمادی مقدور

عفو ایله گذشت ایله اوزون دوت منی مامور

نیلوم که اَلیم قالمادی خدمت گله اَلدن

گوردون اوزون اوزدوم اَلیمی من بیله اَلدن

خدمت قیزلیم چخمادی خالص محکوندن

بیر اود گوتوره بولمدیم اودلی اورکوندن

سالدیم اَلیمی یولدا یاپوشسون اَتکوندن

اَلدن اَتکون کسمه کسیلمیش اَله خاطر

عبّاسی گذشت ایله قان اولموش دله خاطر

هر وقت وفا یوللارینی طیّ ایدن اولسام

بو شاه رهِ دور و درازی گیدن اولسام

باشدان اَیاقا مهر و وفا بیر بدن اولسام

بیر ذرّه وفا جوهره سیندن عَرَض اولماز

تشریفوین اوّل قدمیندن عَوَض اولماز

تشریف گَتور منّتی منده شرف اولسون

دلدن بویانان نسگل اودی برطرف اولسون

بو فرصتی فوت ایلمه جای اَسَف اولسون

نسگل لر اولار فکر بنی آدمه گَلمَز

اَلدن گیدر عبّاس داخی عالمه گَلمَز

من که سنه خدمتده وفور ایسترم اولسون

غم غصّه لریم دلده سُرور ایسترم اولسون

دشمنلریوین گوزلری کور ایسترم اولسون

بولسونله بیزیم عالم سرّ و سریمیز وار

قارداشلقمیزدان سوای عالملریمیز وار

ممکندی بوشالمیش قدح غم دولا بیرده

ممکندی سولان گل آچا بیرده سولا بیرده

ممکندی دوشَن قافله دوشسون یولا بیرده

ممکندی بو دنیا گیده دنیا گَله کرّات

امّا بیز ایکی قارداشی بیرده گورده هیهات

بوللم بو فرات اوستی منه قبر اولی قارداش

بوردا نه سرشکیله نه گوزلر دولی قارداش

گَل مصلحت اولسا اوزون آچ بو یولی قارداش

هر چند گَلَن یوللاریوی بیر گَلَن اولماز

امّا بو یولی سَن گَله سَن گَلمیَن اولماز

چوخلار سنه قربان کسیلوب مهر و وفادن

چوخلار گَلی قربانون اولار صدق و صفادن

تا واردی جهان نام و نشان وار بو منادن

هیچ قربانوین قانی بو گرمیّتی گورمَز

هیچ گوز بیله وحدت بیله جمعیّتی گورمَز

تاپدیم او زمان که آنادان فیض ولادت

وقف ایتدی منی اوندا سنه شاه ولایت

بو باشدا سَنون کیدی که منِیدی امانت

بو سن بو امانت کیمه بذل ایلوسن ایله

حفظینده قصور اولدی نه عدل ایلوسن ایله

قان ایچره یاتان دولت بیداریله باهم

قیلموش اوزینه عزّت دارینی فراهم

دولت بودی عزّت بودی عالمدی بو عالم

بو عالمی تاپماز مگر اهل دل اولانماز

دنیا و متاعیندن اونون غافل اولانماز

بو عالمی تاپماقدان اوتور لیل و نهاری

بیر عمریدی ایلردیم اوزوم روز شماری

اَلمِنَّةُ لِلَّه که نصیب ایلدی باری

چوخ خون دل عمریمده یِمیشدیم بو گون اوسته

بیر باش ایکی قول نذر دیمیشدیم بو گون اوسته

من ماه بنی هاشمم ای شمس ولایت

گون نوری آیا دوشمَسه آیدا نه شرافت

گَل باشیمه سال پرتو مخصوص عنایت

گورسونله که من شیفته ی نور حسینم

دوتسونلا نظرلرده که منظور حسینم

.گورسونله که بی کس دگولم یاخشی کسیم وار .

.بیر سن کیمی بی کس شه فریاد رَسیم وار.

بیر گون که اُلنلَر یغیشار حشره دوباره

هر کیم اَتکون دوتماز، اَلی بوش یوزی قاره

اَلسیزلره اوندا گوره سَن بس نَدی چاره

حلّال اول اوزون اوندا بو مشکللره قارداش

بیر اَل یتور اللرده قالان اللره قارداش

گیتدیم منیله قبره گیدر دلده بو حسرت

دنیاجه منه عمر ویرِیدی ید قدرت

بو عمری اولونجه ایلییِیدیم سنه خدمت

هر لحظه ده مین دفعه اولِیدیم دیریلِیدیم

هر دفعه ده مین یول سنه قربان کسیلِیدیم

یازمیش او شهادت که منه خامه ی تقدیر

اولماز بولورم امر مقدّر تاپا تغییر

سعییم بودی قتلونده بیر آز یوز ویره تاخیر

باشیم قوشا خنجرلریله باش باشا قارداش

بیر دمده غنیمتدی اقلّاً یاشا قارداش

بنزردیم او سروه که رسا قامتی اولسون

بو قامتیله گلشنیوین زینتی اولسون

هر سروی گوروم قول بوداغین حسرتی اولسون

توپراقلار اوتورسون قریلان قول بوداقندا

کوکو قالا قمریلرینون دل دوداقندا

سو اولمادی تا من دایانِیدیم سوزوم اوسته

راضیدیم او ساعت یخلِیدیم یوزوم اوسته

نوفل یاراسی باشدان اُوتوردی گوزوم اوسته

چون گوردی اَلیم آختاریرام حیف اَله دوشمز

من اَلسیزه اَل آچدی که بیرده اَله دوشمز

ای بنده چیلوق عالمینون عالم رازی

عالم سر کویونده دی محراب نمازی

من اهل نیازین سنه وار راز و نیازی

قویما آرامیزدا بو یولی فاصله دوشسون

راز دلیمیز حیفدی دلدن دله دوشسون

فخریم بودی پرورده سیَم سایه ی لطفون

سرمایه ی عمریدی گران مایه ی لطفون

اندازه ی شانوندی منه پایه ی لطفون

ذرّات سنون لطفوین امّیدینه بسته

من ذرّه، سنون لطفوین امّیدینه بسته

بیر عالم اسراره گیدوب یِتملیم من

راز دلیمی گیتمه میش عرض ایتملیَم من

بیر نیمه نگاهیمده دیوب گیتمه لیَم من

وار قانلی گوزون طیِّ لسانی باخشیندا

سوزلر آخاجاق غمزه ده گوزلر آخشیندا

قویسِیدی قضا قویمازیدیم غم سنه گلسون

هر درد و غمون اولسا برادر منه گلسون

درمان سیز اولان دردی گوروم دشمنه گلسون

بو ملّت کافِر که مسلمانی تاپیلماز

بیر حاله سالوبلار منی درمانی تاپیلماز

قاموس معانیده کی معنای محبّت

بازار حقیقتده کی کالای محبّت

سوداگریِ عشقده سودای محبّت

خاک رهون اولماقدی خوشا بیر ایله خاکه

قربان او قدم لردن اوپَن تربت پاکه

اللهین اگر عمر بیوک نعمتی اولسا

بو عمر عزیزین نقدر لذّتی اولسا

عالم هامی بیر لحظه سینین قیمتی اولسا

صرف اولماسا خدمتده سنه ای شهِ خوبان

نقمتدی، بو نعمت دگی عمریم سنه قربان

"ذهنی" یارادیر نوحه ده هنگامه ی اخلاص

امّیدیله آلموش اَلینه خامه ی اخلاص

یازمیش نه گوزل طرز بیله نامه ی اخلاص

هر کلمه سی مین راز دلیمدن خبر ایلر

اعماق دل اهل دله چوخ اثر ایلر

حضرت ابوالفضل(شأنی)

مشکه دگن اوخ منی مایوس ایلدی چوخ

ای کاش دگِیدی گوزیمه مشکه دگن اوخ

بستِیدی حیاتیم بو سویا جاندان اوساندیم

سو مشکیمه اوخ دگدی اوزوم جانه دایاندیم

اصغر عطشه، من شرر خجلته یاندیم

ای کاش دگِیدی گوزیمه مشکه دگن اوخ

من جان به کفم، وقفیدی بو جان شه دینه

یوخ باکیم اُلومدن، ولی ای لشکر کینه

ویرمیشدی منه بو قوروموش مشکی سکینه

ای کاش دگِیدی گوزیمه مشکه دگن اوخ

گوردوم عطشیندن سارالوب صورت اصغر

پوزدی پوزولان حالتیمی حالت اصغر

آز یاره وورون بسدی منه خجلت اصغر

ای کاش دگِیدی گوزیمه مشکه دگن اوخ

چون اهل وفا کوی وفاده منی یوخلار

تصدیق ویروب احسن ایدر عشقیمه چوخلار

بیر گُلشن فردوس ایلیوب سینمی اوخلار

ای کاش دگِیدی گوزیمه مشکه دگن اوخ

اوخ جسمیمه مایلدی منیم، من اونا مایل

بو اوخ نیه بس گیتدی خطا، اولمادی حایل

مشک اوسته دگوب، زحمتیمی ایلدی زایل

ای کاش دگِیدی گوزیمه مشکه دگن اوخ

جان ویرماقا جانانه بو گون تا هوسیم وار

داد ایتسم حسینیم کیمی بیر دادرسیم وار

عجز ایلمرم دشمنیمه تا نفسیم وار

ای کاش دگِیدی گوزیمه مشکه دگن اوخ

لایق دگل هر چند بو جان بو باش حسینه

امّا منی ایتمیشدی آتام یولداش حسینه

من نوکرم، هرگز دگلم قارداش حسینه

ای کاش دگِیدی گوزیمه مشکه دگن اوخ

چوخ سعی و تلاش ایلدیم آخِر اوز ایشیمده

قیردیم نه قَدَر دشمنی بو بیر یوریشیمده

قول گیتدی، دیردیم آپاریم مشکی دیشیمده

ای کاش دگِیدی گوزیمه مشکه دگن اوخ

تا سو اَله گَلدی غم و دردیم آزالشدی

مین همّتیمون ضدّینه بیر تیر چالشدی

سو آخدی، گوزوم باخدی، اورک یاندی، آلشدی

ای کاش دگِیدی گوزیمه مشکه دگن اوخ

سو وعده سینه چون که دیمیشدیم گوزوم اوسته

تا سو واریدی من واریدیم اوز سوزوم اوسته

قالسِیدی سو قولسوز سورونَردیم یوزوم اوسته

ای کاش دگِیدی گوزیمه مشکه دگن اوخ

مین جانیم اولا ویرماقا بیر ذرّه یوخ اکراه

قول گیتدی، باشیم قالدی، بودور علّت دلخواه

لازمدی اولا باشدا نثارِ قدمِ شاه

ای کاش دگِیدی گوزیمه مشکه دگن اوخ

بُلّم یِتَرَم آخِرِ عمریمده مرامه

لطفیله گَلور شه اوزی دیدار غلامه

خوشدور بو باشی اوندا قویام پای امامه

ای کاش دگِیدی گوزیمه مشکه دگن اوخ

هر چند چوخالدوقجا یارا خجلت آزالماز

امّا آزالور اوخ چوخی مندن صورا قالماز

دشمنده قالان اوخ مگر آرامیمی آلماز

ای کاش دگِیدی گوزیمه مشکه دگن اوخ

چوخ سعی ایلدیم من بو سویون حفظینه مطلق

شاهد سوزیمه بو کَسیلن اَلدی، بو بیرق

مقصود دله اولمادیم افسوس موفّق

ای کاش دگِیدی گوزیمه مشکه دگن اوخ

شانی اوزیوی صدقیله بو درگهه سالدون

مقصود دلون حضرت عبّاسیدن آلدون

صد حیف بو حسرتده او سرور کیمی قالدون

ای کاش دگِیدی گوزیمه مشکه دگن اوخ