شهادت حضرت زینب(حسنی)
باجوام مریض فراقوام گل اوزون عیادته یا حسین
اولا جانی زینبیوین فدا ایله بیر کرامته یا حسین
باجی رسمیدی بو جهانیده اولا مبتلای محن اگر
گله قارداشیم دئیر ای خدا، گوزی یاشلی یولّارا گوز تیکر
نیه گلموسن بس عیادته منه لطفون آزدی اَخا مگر
باشیم اوسته گل کرمون گوروم یتیشوب نهایته یا حسین
باجینون امیدیدی قارداشی، باجینون پناهیدی قارداشی
نه قدر سِور سنی زینبون بو سوزه گواهیدی گوزیاشی
دئموسن باجیمدی گیدوم گوروم بو قدر بلایه دوشوب باشی
که وار احتیاجی بو صون نفس بیله بیر حمایته یا حسین
نه قدر اوزاقه دوشم گینه چوخالار محبّتیم عاشقم
ئولنه کیمی سنیلن منیم اولاجاقدی صحبتیم عاشقم
سوزومه گواهدی گوزیاشیم بو دیار غربتیم عاشقم
سنون عشقون اولدی سبب دوشم بو دیار غربته یا حسین
بولوسن مریضیدی زینبون که چوخ احتیاجی دوایه وار
نه دوا، اورکدن علاقه سی او دیار کرب و بلایه وار
هامی دردمنده دوا اولان گوزی ایمدی خاک شِفایه وار
ئوپه، ایگلیه، یوزونی قویا ایله پاک تربته یا حسین
دئمورم شریک غم اولموشام سنه دشت کرب و بلاده من
دئمورم که یاد ایلدیم سنی ال آچاندا ذکر و دعاده من
دئمورم که قاره گیوب اَخا سنه ساخلاموشدیم عزاده من
دئمورم یولوندا دایانموشام چوخ آغور مشقّته یا حسین
دئمورم که یثربی ترک ایدوب بیله اولموشام وطن آیریسی
دئمورم که بلبلم اولموشام یانا یانه گل، چمن آیریسی
دئمورم آنامدان ال اوزموشم بو گون اولموشام حسن آیریسی
دئمورم که قلبیم الولانور یانورام او فرقته یا حسین
دئمورم بو حالیده دیدیمه ئولورم بو گون گلنیم اولا
دئمورم نجفدن آتام گله باشیم اوسته بوالحسنیم اولا
دئیورم که کاش بو کوینگون قویالار منیم کفنیم اولا
من ئولم کفن اولا کوینگون بوکولم بو خلعته یا حسین
بولوسن بو کوینگین اوسته چوخ باشیمی بلالره سالموشام
دولانوب سویان دالیجا بونی یانا یانه آغلیوب آلموشام
بوکولوب بِئلیم آغاروب ساچیم، بو امانت اوسته قوجالموشام
نه امین صادق اولوب باجون بو گوزل امانته یا حسین
نه غمیم نه غصّم اگر منه بو دیار غربت اولوب وطن
باشیم اوسته گرچه عیادته بو گون اولمیوبدی گیدوب گلن
گینه غربت ایچره داریخمارام منه مونس اولدی بو پیرهن
باشیم اوسته گر اولاسان اوزون یترم سعادته یا حسین
بولورم سویاندا بو کوینگی بدنون چوخ اینجیوب آغلارام
قویارام که سینمون اوستونه گئجه یا حسین دیوب آغلارام
آلام عطر پاکیوی صبحلر اودی اگنیمه گئیوب آغلارام
بو یارالی سینمه دور دوا یری یوخدی منّته یا حسین
گوره سن قضا داخی بیر کسی بو زمانه ده منه بنزه در
گوگروبدی قمچیلرین یری بدنیمی سوسنه بنزه در
گیورم که کوینگون اگنیمه منی یا حسین سنه بنزه در
باجون آرزوسیدی قلبیدن یته بو شباهته یا حسین
باشیما ووروب دئیرم آدون ساچیمی الیمله دراخلارام
او قدر سیزیلدارام آغلارام یورولوب او حالیده یوخلارام
یوخوما اگر گله سن اَخا سنی حسرتیله قوجاقلارام
ئوپرم دوداقیوی اشکیمی توکرم او صورته یا حسین
«حسنی» بو شعریده وار یقین سنه دم ویروبدولر اوزلری
نجه داش اورک اولا نرم ایدر اوخونان زماندا بو سوزلری
دیوب هی سیزیلدیوب آغلیوب دولوب اشک حسرته گوزلری
بودی آرزوی نهایتی گله بیر زیارته یا حسین
حسنی
بولوسن که درد نهانیمی سنه بیر فقط دیرم آقا
شرر غمونده اورک یانار اودی خون دل ییرم آقا
دولانوب محرّم آیی اولار قره کوینگی گییرم آقا
قره کوینگیله یقیندور یترم سعادته یا حسین
