منه ای یزید ائوینده بو دلیله یاه ورما
بولوسن سینیقدی قلبیم یارا سن دوباره ورما
گتوروبدی درده ظالم منی محنت و ستم لر
دوزولوبدی مجلسونده قولی باغلی بو حرم لر
گچوب حدّیدن ملالیم منه آز دگل بو غم لر
ستم آتشین علاوه دل داغداره ورما
اله خیزران آلوبسان ائده سن عداوتون فاش
وروسان لب حسینه سنه نیلیوب کسوک باش
اولا جدّیم ایندی بوردا باخا بیله ظلمه ای کاش
دئیه خیزران بو لعل لب دُر نثاره ورما
اوزوی تکبّریله هامی خلقیدن سچورسن
اوچ امام محضرینده نیه حدّیدن گچورسن
باخوسان امام عصره گولوسن شراب ایچورسن
یارا اوسته یاره ظالم دل زخمداره ورما
بولوسن اوزون مسلمان ندی سنده بو عداوت
بو بنات مصطفایه نیه ایلوسن شماتت
نه روادی اهل بیته بو جفای بی نهایت
بو قدر ائوینده طعنه من دلفگاره ورما
قاباقوندا چوخ محقّر گوروسن سر حسینی
سالوسان خیالیوه سن گه او بدریله حنینی
بئله خوار ئولدوروبسن بو امام مشرقینی
یانور اهل بیت بیرده بولارا شراره ورما
نقدر واروندی «زایر» سنون الده اختیارون
بو مصائبه قلم وور اوجالاندا آه و زارون
او قدر سیزیلدا اولسون بو حسین امیدوارون
بئله یرده مصرف ایله قلم اوزگه کاره ورما
«زایر(ره)»
